Në sheshin “Adem Jashari” është mbajtur Karvani Shëndetësor “PërSHËNDETje”, aktivitet informues dhe vetëdijesues për qytetarët mbi rëndësinë e kujdesit shëndetësor dhe parandalimin e sëmundjeve jo të transmetueshme (SJT-të).
Në këtë aktivitet morën pjesë Kryetari i Komunës, Sami Lushtaku, Drejtori i Shëndetësisë, Hasan Hoti, si dhe profesionistët shëndetësorë të QKMF-së, të cilët bashkëbiseduan me qytetarët dhe ofruan informata të rëndësishme mbi ruajtjen e shëndetit dhe parandalimin e sëmundjeve.
Kjo fushatë zbatohet nga OJQ “MUNDËSIA”, në kuadër të projektit “Kujdesi Shëndetësor i Qasshëm dhe Cilësor (AQH)”, i cili financohet nga Agjencia Zvicerane për Zhvillim dhe Bashkëpunim (SDC) dhe zbatohet nga Swiss TPH.
Qëllimi i kësaj iniciative është informimi dhe vetëdijesimi i popullatës për sëmundjet jo të transmetueshme, duke promovuar kujdesin e hershëm dhe stilin e shëndetshëm të jetesës.
