Kudusi Hasko, profesor nga Shqipëria, duke u shprehur i kënaqur që gjendej në Drenicë, e cila sipas tij më së miri e ka përmbushur sloganin “me pushkë e penë për mëmëdhenë”, ka thënë se ardhja në Skenderaj nga disa troje arbërore, përkujton shtegtimin e mësuesit Rrahim. “Me pishtarin e dritës dhe diturisë, me abetaren-librin e shqipes, dhe shpirtin e shqiptarisë që ai e kultivoi në mendjen e shumë brezave, promovimi i këtij libri është homazh i jetës dhe veprës fisnike në 100 vjetorin e lindjes së këtij pishtari të diturisë”, është shprehur profesori Hasko, duke shtuar se është kujtesë për vështirësitë dhe sakrificat mbinjerëzore të përhapjes së shkollës dhe arsimimit të gjuhës amtare, si dhe dëshmi e përpjekjeve titanike për konservimin e identitetit kombëtar… Ndërkaq botuesi i monografisë Rrezart Gashi, nga Instituti i Integrimit të Kulturës Shqiptare në Tiranë, foli për autorët e librit, Fazli Hajrizi dhe Ibrahim (Rrahim) Gashi. “Autorët e kësaj monografie kanë kombinuar në mënyrë të harmonishme dokumentet e mbledhura nëpër arkiva të ndryshme në Tiranë, Krujë, Mitrovicë, Prishtinë e gjetkë, me intervista e deklarata të dhëna nga personat e rëndësishëm që njohën në të kaluarën mësuesin Rrahim dhe familjen e tij”. Për mësuesin Rrahim Gashi, ka folur edhe drejtori i Drejtorisë së Arsimit në Skenderaj, Jashar Lushtaku, i cili tha se lindja e tij koincidon me hapjen e shkollës së parë shqipe, më 1909 në Polac, nga Hasan Prishtina. “Kudo që punonte kishte suksese, deri në largimin e tij nga Kosova, për shkak të presionit serb. Ky libër paraqet aktivitetin e tij që bartte si mësues dhe patriot, si dhe luftën e vazhdueshme për çlirimin e trojeve shqiptare nga pushtuesit barbarë”, ka thënë Lushtaku. Ai ka shtuar se ky manifestim i paraprin aktiviteteve që do të mbahen në kuadër të festave të nëntorit. Duke falënderuar autorët e librit, të cilët ndërmorën këtë hap, për të ndriçuar veprën e mësuesit të madh, ai tha se me këtë manifestim kulturor do të lahet borxhi mësuesve të parë. Për mësuesin Rrahim Gashi dhe veprimtarinë e tij, kanë folur edhe Halil Kajtazi, Sala Ahmeti, autori Fazli Hajrizi, etj. Skenderaj, 22 nëntor – Në 100 vjetorin e lindjes së njërit nga mësuesit e parë të Drenicës, Rrahim Gashi nga fshati Kotorr i Skenderajt, të hënën në sallën e madhe të Shtëpisë së Kulturës “Hasan Prishtina” në Skenderaj, në praninë e rreth 400 pjesëmarrësve, figura të njohura publike të sferave të ndryshme, është promovuar monografia “Mësuesi Rrahim, me breza në trojet arbërore”, i autorëve Fazli Hajrizi dhe Ibrahim (Rrahim) Gashi. Ky manifestim është organizuar nga Drejtoria Komunale për Arsim dhe Instituti për Integrimin e Kulturës Shqiptare-Tiranë.
