Edhe pse kanë qenë të ftuar zyrtarët e Distribucionit në Skenderaj, ata kanë munguar, me arsyetimin së akoma nuk është emëruar shefi i kësaj njësie. Sidoqoftë, kryesuesi i Komitetit për Komunitete, ka thënë se shpreson që zyrtarët e KEK-ut do të jenë të pranishëm në takimin e ardhshëm të komitetit, për të dhënë shpjegime lidhur me moszbatimin e marrëveshjes në fjalë, pasi sipas tij, serbët, të cilët janë duke i paguar faturat për rrymën e shpenzuar, janë të pakënaqur me reduktimet e energjisë elektrike. Nedelko Kovaqevic, shef i Zyrës Lokale të Komuniteteve (ZLK) në Bajë, duke raportuar për periudhën ndërmjet dy mbledhjeve të fundit, ka folur për situatën e sigurisë në dy fshatrat me shqiptarë e serbë, duke e vlerësuar atë të qetë dhe pa ndonjë problem ndëretnik. Ai mandej ka folur për aktivitetet e ZLK-së, në kuadër të përgatitjeve për regjistrimin e popullsisë, që fillon në muajin prill. Në pyetjen së cili është disponimi i banorëve serb për të marrë pjesë në këtë proces, Kovaqevic, ka thënë: “Për momentin nuk mund ta dimë se si do të shkojë procesi, megjithëse unë besoj së serbët do të marrin pjesë në regjistrim. Sa i përket Zyrës Lokale të Komuniteteve, ne jemi duke i zhvilluar aktivitetet që na takojnë, në kuadër të sensibilizimit të popullatës serbe për regjistrimin e popullsisë. Jemi duke i njoftuar banorët me disa broshura për këtë proces”, ka njoftuar Kovaqevic. Megjithëkëtë, ai ka thënë se banorët serb mund të mos kenë njohuri të mjaftueshme për procesin e regjistrimit të popullsisë, duke qenë se serbët nuk i përcjellin mediat kosovare, të cilat janë duke zhvilluar vazhdimisht fushatë mediale, ndërsa mediat serbe, siç tha ai, nuk i kushtojnë rëndësi regjistrimit. Për situatën e sigurisë në gjithë territorin e komunës së Skenderajt, veçanërisht në Bajë dhe Syriganë, foli edhe zëvendëskomandanti i Stacionit Policor në këtë komunë, togeri Agim Idrizi. Ai ka thënë se situata është e qetë dhe stabile. “Gjithashtu rendi dhe qetësia publike janë në nivel, liria e lëvizjes është e kënaqshme për të gjitha komunitetet që jetojnë në Skenderaj, si dhe është shënuar ngritje të raporteve ndërmjet komuniteteve në Bajë dhe Syriganë”, ka thënë numri dy i policisë në Skenderaj. Nga ana e tij, shefi i Zyrës Lokale të Komuniteteve, e pyeti zyrtarin policor nëse lejohet qarkullimi i automjeteve me targa të reja të shtetit tonë fqinj, Serbisë, në territorin e Republikës së Kosovës. Duke iu referuar vendimit të Ministrisë së Punëve të Brendshme të Kosovës, Idrizi ka thënë se ai ua ndalon qarkullimin të gjitha automjeteve me targa e Serbisë në vendin tonë. Sipas tij, të gjitha automjetet që kanë regjistrimin KS, do të mund të vazhdojnë lëvizjen deri në skadimin e afatit, të cilat më pas, duhet të pajisen me targat e reja RKS. Në anën tjetër, zyrtari komunal për kthim, Fatmir Balaj, i njoftoi anëtarët e Komitetit për Komunitete, për takimet që ka pasur me përfaqësuesit e Ministrisë për Kthim dhe Komunitete, me të cilët ka diskutuar koncept-dokumentin për kthimin e të shpërngulurve. Ai ka thënë se ky dokument do të financohet nga institucionet e reja shtetërore, sapo të formohet Qeveria dhe miratohet buxheti.
Skenderaj, 16 shkurt – Millutin Kovaqevic, kryesues i njërit prej dy komiteteve obligative të Komunës së Skenderajt, atij për Komunitete, as në mbledhjen e radhës të këtij organi nuk ka marrë përgjigje nga zyrtarët e KEK-ut, në kërkesën e komunitetit serb të fshatrave me popullatë të përzier, Bajë dhe Syriganë…
