Në kuadër të aktiviteteve për ngritjen e vetëdijes publike dhe parandalimin e dukurive negative, është mbajtur ligjëratë edukative-informative në gjimnazin “Hamëz Jashari” në Skenderaj.
Kjo nismë, e mbështetur nga institucionet lokale dhe organet e rendit, u fokusua tek tema sensitive dhe jetike: “Trafikimi me njerëz – Trafikimi i prek të gjithë! Ta mbrojmë veten dhe fëmijët tanë!”
Ligjërata u drejtua nga zyrtarë kompetentë të Drejtorisë për Hetimin e Trafikimit me Qenie Njerëzore, në bashkëpunim me Drejtorinë për Administratë, Njësinë për të Drejtat e Njeriut dhe Zyrën për Barazi Gjinore të Komunës së Skenderajt.
Gjatë këtij takimi me nxënës dhe staf arsimor, u trajtuan aspektet kyçe të kësaj dukurie, u
diskutua mbi llojet e ndryshme të trafikimit, përfshirë shfrytëzimin me qëllim të shfrytëzimit seksual, trafikimin e fëmijëve për kërkim lëmoshe, si dhe detyrimin apo shfrytëzimin e fëmijëve për punë të rënda.
Nxënësit u informuan se si të njohin rreziqet e mundshme dhe rëndësinë e mos heshtjes përballë rasteve të tilla.
Gjatë aktivitetit u shpërndanë fletushka edukative me udhëzime të qarta se si komuniteti dhe të rinjtë mund të mbrohen.
Mesazhi kryesor i përcjellë gjatë gjithë ligjëratës ishte thirrja e fuqishme për veprim: “Mos hesht, raporto!”
Numrat e emergjencës për çdo rast të dyshimtë:
0800 11 112 ose 192 (Policia e Kosovës)
E-mail zyrtar: antitrafikimi@kosovopolice.com
