Skenderaj, 17 shkurt – Me homazhe në varrezat e Jasharëve në Prekaz, Polac e gjetiu, dhe në Kompleksin Përkujtimor të UÇK-së në Marinë, mandej me vizita nëpër familjet e dëshmorëve të kësaj komune, dhe me një akademi solemne në Shtëpinë e Kulturës, është shënuar dyvjetori i shpalljes se pavarësisë së Kosovës, në komunën e Skenderajt.Në këto aktivitete kanë marrë pjesë personalitete të shquara të Kuvendit dhe Qeverisë së Kosovës, FSK-së, Policisë së Kosovës, Shoqatave të dala nga lufta dhe institucioneve të tjera të shumta të komunës së Skenderajt dhe mijëra qytetarë.
Pasi ka bërë homazhe në varrezat e dëshmorëve në Prekaz, kryeparlamentari Jakup Krasniqi, tha se Jasharët për Kosovën hapen një epokë të madhe, epokën e lirisë, pavarësisë dhe demokracisë. “Duke u përulur para këtyre burrave e grave, që gjithçka që patën e dhanë për të ardhmen tonë, ne nderojmë të gjithë dëshmorët dhe ata që në forma të ndryshme ranë për lirinë tonë, edhe ata që nuk kanë varre, apo nuk kanë as ndonjë gurë të koka, por që për ne kanë hapur perspektiva të reja”, ka thënë Krasniqi.
Ai mandej tha se sigurisht se njerëzit e sotshëm e kanë vështirë ta çojnë në vend në tërësi amanetin e dëshmorëve, edhe pse jemi duke u angazhuar por duhet të angazhohemi edhe më shumë.
Ndërkaq, ministër i FSK-së, Fehmi Mujota, u zotua se obligimet që i ka dhënë koha do të kryhen me përkushtimin të madh. “FSK do të jetë përherë në mbrojtje të qytetarëve dhe të shtetit të Kosovës, rrënjët e të cilit janë në gjakun e derdhur të vajzave dhe djemve më të mirë të kombit”, tha ai.
Duke folur në akademinë solemne të organizuar në Shtëpinë e Kulturës në Skenderaj, Flora Brovina, shtetin e ri të Kosovës e ka krahasuar me foshnje e cila erdhi në jetë para dy vitesh nga pellgu i gjakut të dëshmorëve dhe sakrificës kombëtare. “Shteti u bë dhe rinia brohoriti gjithandej “Bac, u kry !”. Dy vjet pas, këtu në Prekaz përulemi me nderim dhe përshpërisim “Bac, kemi shumë punë për të bërë”, ka thënë Brovina. Ajo mandej shtoi se shteti, për t’u rritur dhe për të qenë i barabartë në familjen e madhe të shteteve, kërkon sakrifica të tjera.
Nga ana e tij, Rifat Jashari, pasi uroi për përvjetorin e shtetësisë tha. “Ishalla Zoti na jep të mbarën, na jep shëndet e na e kthjell mendjen dhe e çojmë Kosovën përpara”.
Ndërsa, Sami Lushtaku, kryetar i komunës, konstatoi se pavarësia e Kosovës është kurorëzim i sakrificave të gjeneratave të tëra të cilat nuk u nënshtruan dhe nuk u pajtuan me robërinë.
Skenderaj, 17 shkurt – Me homazhe në varrezat e Jasharëve në Prekaz, Polac e gjetiu, dhe në Kompleksin Përkujtimor të UÇK-së në Marinë, mandej me vizita nëpër familjet e dëshmorëve të kësaj komune, dhe me një akademi solemne në Shtëpinë e Kulturës, është shënuar dyvjetori i shpalljes se pavarësisë së Kosovës, në komunën e Skenderajt.
