Prekaz, Skenderaj, 6 gusht – Kryeministri i Republikës së Kosovës, Hashim Thaçi, ka pranuar së janë vonuar institucionet e Kosovës në nxjerrjen e Projektligjit për Statusin dhe të Drejtat e Dëshmorëve, Invalidëve, Veteranëve, Pjesëtarëve të UÇK-së, Viktimave Civile dhe Familjeve të tyre. Por ai ka thënë se ndihet krenar që është realizuar ky projektligj.
“Pas 11 vitesh të heshtjes ky projektligj ka kaluar në Qeverinë e Kosovës, do të kalojë edhe në komisionet parlamentare, por edhe në Parlamentin e Kosovës. Projektligji ka një kosto të lartë, por sakrifica e njerëzve është edhe më e madhe, prandaj do të vazhdojmë zbatimin e tij”, ka thënë të premten kryeministri Thaçi gjatë një vizite në Prekaz të Skenderajt, me qëllim të inspektimit të punimeve në ndërtimin e Kompleksit Memorial “Adem Jashari”.
Pas nderimeve te varri i komandantit të Ushtrisë Çlirimtare të Kosovës dhe të rënëve tjerë të Lagjes Jashari, kryeministri që shoqërohej nga kryetari Sami Lushtaku dhe zëvendësministri i Ambientit dhe Planifikimit Hapësinor, ka shëtitur nëpër hapësirën e Kompleksit duke parë nga afër punimet që janë duke u zhvilluar tash e katër vite. Me gjithë vonesat që e kanë shoqëruar realizimin e këtij projekti nacional, shefi i Qeverisë ka thënë se punimet janë duke vazhduar me intensitetin e planifikuar. “Jemi sot këtu për t’i inspektuar punimet në ndërtimin e Kompleksit Përkujtmor “Adem Jashari”.
Punimet janë duke vazhduar me intensitet të planifikuar. Qeveria do të vazhdojë t’i kryej obligimet e veta karshi kompleksit të komandantit legjendar dhe familjes së tij, që është edhe sublimimi i sakrificave, përpjekjeve shekullore të popullit tonë për pavarësi dhe shtet. Në veçanti tani, kur kemi nxjerr projektligjin për veteranët e luftës, familjet e dëshmorëve, invalidëve, civilëve dhe familjeve të të zhdukurve, që përfshijnë periudhën 1945 deri në shtator të vitit 1999”, ka theksuar ai. Thaçi tutje ka pohuar se do qeveria dhe institucionet tjera do të vazhdojnë me të gjitha angazhimet, përkushtimet dhe agjendën shtetërore me qëllim të përmbylljes më kohë të të gjitha punimeve në projektin e Kompleksit Memorial në Prekaz, për të cilin kryeministri tha se bashkon të gjithë shqiptarët kudo ndodhen. “Është një kompleks që bashkon të gjithë shqiptarët, është një kompleks në të cilin të gjithë marrin energji të reja, për të ardhmen dhe për ruajtjen dhe kultivimin e vlerave kombëtare për të kaluarën”, ka nënvizuar ai, duke shtuar se tani është çështje e ekipeve profesionale dhe ekipeve teknike të ministrive përkatëse të përfundojnë sa më parë këtë projekt.
Rreth projektligjit të përbashkuar
I pyetur për Projektligjin së a është i njëjtë si për veteranët dhe invalidët e luftës së UCK-së, ashtu edhe për serbët, kryeministri Thaçi ka thënë se ai përfshinë të gjitha kategoritë (veteranët, familjet e dëshmorëve, invalidët, viktimat civile dhe të pagjeturit). “Gjithçka është e planifikuar dhe e qartësuar në projektligj.
Të përfshirë pra të gjithë, veteranët, familjet e dëshmorëve, invalidët, viktimat civile, të pagjeturit, dhe në të njëjtën kohë është gjithëpërfshirës. Është një projektligj që bashkon të gjithë, në veçanti respekton njerëzit me uniformë të UCK-së, dhe në të njëjtën kohë të gjithë qytetarët që kanë kontribuar për lirinë e vendit”, ka thënë kryeministri i vendit, sipas të cilit, nga ky projektligj përfitojnë të gjithë ata që kanë punuar dhe luftuar për çlirimin e vendit dhe largimin e Serbisë nga Kosova. Kryeministri i vendit është pyetur edhe për propozimin e një rezolute nga ana e Kosovës për zhvlerësimin e Rezolutës 1244 në Këshillin e Sigurimit të Organizatës së Kombeve të Bashkuara, si dhe ka lavdëruar shefin e diplomacisë kosovare, Skënder Hysenin për paraqitjen e tij në seancën e Këshillit të Sigurimit në Nju Jork.
“Qeveria e Kosovës ka qëndrime unike. Unë i kuptoj zërat e ndryshëm. Ne kemi prezantuar një politikë dhe diplomaci unike si shtet i Kosovës. Zotri Hyseni ka bërë një prezantim të shkëlqyer në Këshillin e Sigurimit. Kjo është një fitore historike dhe e jashtëzakonshme e Qeverisë së Kosovës, si dhe e palës kosovare në GJND”, ka shtuar kryeministri. Ai tha se tani duhet të lëvizin përpara, në mënyrë që Kosova të integrohet në NATO dhe BE, por edhe në Organizatën e Kombeve të Bashkuara. I pari i Qeverisë së Kosovës ka thënë se njerëzit që mendojnë se nuk mund të anëtarësohet Kosova në OKB, kanë qenë skeptikë edhe për lirinë e Kosovës, si dhe për opinionin e GJND-së, prandaj, siç shtoi ai, janë zëra të ndryshëm që nuk janë të informuar për sukseset historike të Kosovës dhe diplomacisë së saj.
Prekaz, Skenderaj, 6 gusht – Kryeministri i Republikës së Kosovës, Hashim Thaçi, ka pranuar së janë vonuar institucionet e Kosovës në nxjerrjen e Projektligjit për Statusin dhe të Drejtat e Dëshmorëve, Invalidëve, Veteranëve, Pjesëtarëve të UÇK-së, Viktimave Civile dhe Familjeve të tyre. Por ai ka thënë se ndihet krenar që është realizuar ky projektligj.
