Skenderaj-Drenas, 22 shtator – Një delegacion i Komunës së Skenderajt, i udhëhequr nga kryetari Sam Lushtaku, fillimisht ka bërë homazhe te Kompleksi Varrezave të Dëshmorëve në fshatin Tërnafc të Skenderajt, me rastin e 12 vjetorit të rënies heroike të dëshmorëve Naim dhe Shemsedin Haxhiut, për të vazhduar drejt fshatit Shkabaj të Drenasit.
Në Shkabaj të komunës së Drenasit me aktivitete përkujtimore janë nderuar Fehmi e Xhevë Lladrovcit, në përvjetorin e 12 të rënies heroike të tyre dhe dëshmorëve të tjerë, në luftën e lavdishme të Ushtrisë Çlirimtare të Kosovës për çlirimin e vendit nga ushtria dhe policia serbe. Përveç anëtarëve të ngushtë të familjes, në këtë shënim kanë marrë pjesë personalitete të ndryshme nga jeta politike, veprimtarë të kauzës shqiptare, ushtarakë të lartë të FSK-së, bashkëluftëtarë të Fehmiut e Xhevës, delegacione komunash si dhe të qytetarë të tjerë. Pas homazheve në kompleksin e varrezave të dëshmorëve, veprimtari i shquar i çështjes shqiptare dhe ish i burgosuri politik, Adem Demaci, tha se lirinë e Kosovës e kemi falë sakrificës dhe gjakut të derdhur të dëshmorëve të lirisë. “Po më vjen mirë që populli i Drenicës nuk po i harron heronjtë e vet, nuk po i harron dëshmorët e vet, dhe është i vetëdijshëm së këtë frymëmarrje të lirë e kemi falë sakrificës dhe gjakut të tyre”, ka thënë Demaçi, duke shtuar se ky përvjetor le të jetë një hap më tutje drejt përpjekjeve për të përmbushur dhe plotësuar dëshirën e heronjve të Kosovës. Ndërkaq kryetari i Komunës së Drenasit, Nexhat Demaku u shpreh se vepra dhe sakrifica e Fehmi e Xhevë Lladrovcit nderuan jo vetëm Drenicën por gjithë kombin shqiptar. Edhe kryetari i komunës fqinje, Skenderajt, Sami Lushtaku, pas homazheve te varrezat e dëshmorëve, tha se sakrifica dhe gjaku i derdhur i Fehmiut dhe Xhevës, por edhe i dëshmorëve të tjerë, sollën lirinë që ne e gëzojmë sot. Ai tha se dëshmorët e lirisë do të kujtohen gjithmonë me krenari nga brezat që do të vijnë.
Skenderaj-Drenas, 22 shtator – Një delegacion i Komunës së Skenderajt, i udhëhequr nga kryetari Sam Lushtaku, fillimisht ka bërë homazhe te Kompleksi Varrezave të Dëshmorëve në fshatin Tërnafc të Skenderajt, me rastin e 12 vjetorit të rënies heroike të dëshmorëve Naim dhe Shemsedin Haxhiut, për të vazhduar drejt fshatit Shkabaj të Drenasit
