Ministri i Arsimit, Shkencës dhe Teknologjisë në Republikën e Kosovës, Ramë Buja, së bashku me ambasadorin e Norvegjisë në vendin tonë, Swerre Johan Kvala, kanë qëndruar sot në Skenderaj, me ç’rast kanë vizituar Shkollën e Mesme Profesionale, e njohur si Qendra Kompetente e Ndërtimtarisë, investim prej 4 milionë eurosh i Qeverisë norvegjeze. Të shoqëruar nga zyrtarët e lartë të Komunës së Skenderajt, Buja dhe Kvale kanë inspektuar punimet e papërfunduara që po zhvillohen në disa sektorë të objektit.Ambasadori norvegjez ka thënë se është i kënaqur me atë që është punuar në ndërtimin e shkollës dhe dita-ditës ajo po merr pamje të re. I pyetur se a është i kënaqur me numrin e nxënësve, Kvale ka thënë se është i kënaqur, duke shtuar se pret që vitin e ardhshëm të ketë më tepër interesim të nxënësve. Ndërkaq, ministri i Arsimit, Ramë Buja, që ishte vizita e tij e parë në cilësinë e ministrit, i ka vizituar punëtoritë ku nxënësit bëjnë punën praktike. Buja ka thënë se Qendra Kompetente e Ndërtimtarisë ka krijuar kushte të mira për mësim cilësor, për përgatitjen e të rinjve për tregun e punës, si faktor i rëndësishëm për zhvillimin ekonomik të vendit. Ndërkaq drejtori i Drejtorisë për Arsim në Skenderaj, Jashar Lushtaku, ka thënë se është kënaqësi për Komunën që ka pasur fatin ta ketë qendër, e para dhe e vetmja në Ballkan. “Prandaj jo rastësisht ministri Buja e ka zgjedhur në radhë të parë ta vizitojë këtë qendër. Ne i jemi mirënjohjes ambasadorit Kvale dhe qeverisë norvegjeze që kanë kontribuar për ndërtimin e kësaj shkolle. Qendra Kompetente e Ndërtimtarisë në vitin e parë të punës ka gjithsej 230 nxënës, numër ky që shpresojmë se do të rritet në vitin e dytë”, ka thënë drejtori Lushtaku, duke shtuar se po punohet intensivisht në finalizimin e punëve që kanë mbetur, si salla e edukatës fizike dhe ambientet përreth, megjithëse siç tha ai, mësimi teorik dhe praktik po zhvillohen normalisht dhe në një ambient bashkëkohor. Në anën tjetër, punëkryesi ka premtuar se deri në fund të muajt mars salla do të jetë e gatshme, ndërsa sa i përket restorantit, punët kanë përfunduar. Pas vizitës në Qendrën e Kompetencës në Skenderaj, ambasadori Kvale dhe ministri Buja kanë vizituar edhe Qendrën Kompetente në Malishevë.
Skenderaj, 18 mars – Ambsardori Kvale dhe ministri Buja u shprehen të kënaqur me ndërtimin e Qendrës Kompetente të Ndërtimtarisë, e cila ende nuk ka përfunduar e tëra. Kjo shkollë aktualisht numëron 230 nxënës, por shpresat janë se vitin e ardhshëm numri do të rritet…
