Moisiu ka thënë se lufta e Adem Jasharit dhe familjes së tij është një sakrificë dhe kontribut i madh. “Është një sakrificë dhe kontribut i madh i familjes Jashari dhe lagjes me 52 anëtarë të rënë. Pa këtë sakrificë dhe këtë gjak, nuk mund të arrish këto ditë që ka arritur Kosova. Liria nuk dhurohet, ajo fitohet dhe ajo paguhet me gjak”, ka thënë ai. Më tej Moisiu ka thënë se shqiptarët e Kosovës kanë pasur fat të rëndë, pasi gati një shekull kishin luftuar me pushuesin serb, që nga vitet e para të pushtimit e deri te çlirimi i Kosovës më 1999. “Megjithatë, duhet thënë që rreziqet nuk janë ato që kanë qenë, por rreziqet nuk janë zhdukur. Pra, kësaj duhet t’ i përgjigjemi me punë, me bashkim, për të luftuar për një qëllim të përbashkët. Ka rëndësi që rinia të edukohet, që këto ditë që janë nuk i ka dhuruar kush, por gjithashtu këto ditë dhe arritjet duhet mbrojtur me punë, me djersë, duke studiuar dhe duke u bërë sa më të ndershëm për Kosovën, për të ndërtuar një shtet ligjor, sipas parametrave evropianë”, ka thënë gjatë vizitës së tij në Prekaz, ish presidenti i Shqipërisë Alfred Moisiu.
Moisiu, edhe një herë e ka quajtur Kosovën krahinë të Shqipërisë, dhe ka porositur të gjithë të mos kenë frikë apo të druhen ta shprehin këtë, sepse është një e vërtetë historike. “E kam thënë edhe më parë, që Kosova është krahinë e Shqipërisë, kështu ka qenë, nuk është se po e shpik unë. Ky është një realitet. Nuk duhet të kemi frikë dhe nuk duhet të druhemi që ta themi, sepse kjo është një e vërtetë historike”, ka thënë Moisiu.
Ndërkaq, kryetari i Organizatës së Veteranëve të Luftës së UÇK-së (OVLUÇK), Muharrem Xhemajli, ka thënë se Kosova nuk ka ende datë të dëshmorëve të përcaktuar nga institucionet e vendit. “Siç dihet data 5 maj është Dita e Dëshmorëve të Kombit Shqiptar, dhe ne jemi këtu, në Prekaz për t’i nderuar dëshmorët. Ne si organizata të luftës jemi duke bërë përpjekje që në Kosovë të kemi datë të dëshmorëve. Ne ende nuk kemi ditë të dëshmorëve të përcaktuar nga institucionet e Kosovës, prandaj jemi duke punuar vazhdimisht që kjo ditë të jetë e përbashkët për të gjithë shqiptarë”, ka thënë Xhemajli.
Skenderaj, 5 maj –Ish presidenti shqiptar, Alfred Moisiu, është pritur nga kryetari i Komunës së Skenderajt, Sami Lushtaku dhe përfaqësues të Shoqatave të dala nga lufta e UÇK-së, të cilët, me një vizitë në kompleksin Përkujtimor “Adem Jashari” në Prekaz, bashkërisht kanë nderuar dëshmorët e Kosovës me rastin e Ditës së Dëshmorëve të Kombit Shqiptar.
