Kryetari i Komunës, Sami Lushtaku, i ka propozuar Komitetit për Politikë e Financa t’i rekomandojë Kuvendit Komunal, që në mbledhjen e ardhshme, e cila do të mbahet më 29 korrik, të marrë vendimin për shfuqizimin e vendimit me nr.: 463-133, të datës 05.05.2008, me të cilin “Tehnopolisit” i është dhënë në shfrytëzim afatgjatë prona e paluajtshme komunale për Parkun Teknologjik. Në arsyetimin e kryetarit përmenden arsyet e dhënies në shfrytëzim afatgjatë të pronës komunale kompanisë në fjalë, sipas të cilave, vendimi ishte marrë me qëllim të krijohen mundësi për investime të huaja, si e vetmja mundësi për zbutjen e papunësisë, që ishte edhe një ndër prioritetet e Komunës. “Vendimi për dhënie në shfrytëzim afatgjatë të pronës së paluajtshme komunale kompanisë sllovene “Tehnopolis” LLC-Celje ishte marrë me qellim që të krijohen mundësi për investime të huaja, si e vetmja mundësi për zbutjen e papunësisë, që ishte njëkohësisht edhe prioritet i komunës. Me këtë vendim ishin hapur mundësi që në përputhje me Ligjin e Prokurimit dhe Ligjin mbi Zonat Ekonomike, ta kemi një zonë ekonomike të themeluar dhe gjithashtu ta kemi një projekt detaj të emëruar Parku Teknologjik, për realizimin dhe shfrytëzimin e të cilit komuna kishte hyrë në marrëdhënie kontraktuale (kontrata nr. 351-495 e datës 24.09.2009) me “Tehonopolis” LLC-Celje (nr. i identifikimit 643-09-040611), Slloveni, kompani e cila nuk i përmbushi obligimet e përcaktuara ma kontratë”, ka shpjeguar kryetari Sami Lushtaku, duke precizuar, se ka ekzekutuar vendimin për shkëputjen e kësaj kontrate. Pas këtij vendimi të kryetarit Lushtaku, përfundimisht u jepet fund “mashtrimeve” të njëpasnjëshme të “Tehnopolisit”, përfaqësuesit e të cilit për dy vjet më radhë patën maltretuar autoritetet komunale dhe qytetarët, duke u premtuar vende të reja pune. Sikur të mos mjaftonte kjo, drejtoresha e “Tehnpolisit” në Skenderaj, Sonja Rotar, në ditën e inaugurimit në gush të vitit 2010 kishte premtuar se projekti do të përfundoj brenda 15 muajve, megjithëse, njohësit e zhvillimeve ekonomike, kishin shprehur skepticizëm për premtimet e saj, aq më parë, kur një projekt i këtillë kishte dështuar edhe në Komunën e Shtimes. Dështim pas dështimi dhe inaugurim pas inaugurimi, të gjashtin më radhë, drejtoresha Rotar së fundi kishte premtuar se më nuk do të ketë shtyrje dhe shkelje të afateve. Por premtimet e saj nuk binden kryetarin Lushtaku të ndërrojë mendje, që kishte vendosur shkëputjen e kontratës.
Nëse projekti në fjalë do të realizohej sipas kontratës, në të do të hapeshin 33 biznese dhe rreth 400 vende të reja pune.
Skenderaj, 26 korrik – Si pasojë e mospërmbushjes së detyrimeve të përcaktuara në kontratë, për ndërtimin e Parkut Teknologjik, në afërsi të ish-Fabrikës së Municionit dhe Gjuetisë në Skenderaj, autoritetet komunale kanë marrë vendim për shkëputjen e kontratës me kompaninë sllovene “Tehnopolis” nga Celja.
